काठमाडौं – चलचित्र पत्रकार दिनेश सिटौलाको पार्थिव शरीर श्रद्धाञ्जलीका लागि चाबहिलस्थित चलचित्र विकास बोर्डका राखिने भएको छ ।

चलचित्र पत्रकार संघ नेपालका सचिव रघुनाथ सापकोटाका अनुसार सिटौलाको पार्थिव शरीर ग्रान्डी अस्पतालबाट निकालेर बोर्डमा लगिनेछ ।

आइतबार साढे २ देखि ३ बजेसम्म त्यहाँ राखेर शव अन्त्येष्टिका लागि परिवारको जिम्मा लगाइने उनले बताए । सिटौलालाई आइतबार १२ : ४५ बजे ग्रान्डी अस्पतलालले मृत घोषित गरिसकेको छ।

राष्ट्रिय स्वतन्त्र पार्टी (रास्वपा)का वरिष्ठ नेता बालेन्द्र शाहसँग चुनावी प्रचारमा हिँड्दा सिटौला अछाममा बेहस भएर ढलेका थिए । उनलाई नेपाली सेनाको हेलिकप्टरबाट सुर्खेतसम्म र त्यहाँबाट स्काई ट्रकममा काठमाडौं ल्याइ ग्रान्डी अस्पतालमा भर्ना गरिएको थियो ।

४५ वर्षीय सिटौला चलचित्र पत्रकार संघ नेपालका पूर्वअध्यक्ष हुन् । पछिल्लो समय फिल्महरूको मिडिया संयोजकका रुपमा सक्रिय थिए । उनले सिने अनलाइन पनि चलाउँदै आएका थिए ।