काठमाडौं- महान्यायाधिवक्ता सविता भण्डारीले पदको दुरुपयोग गर्दै गम्भीर प्रकृतिका मुद्दा नचलाउने निर्णय गरेको आरोपसहित दर्ता गरिएको उजुरीमाथिको कारबाहीबारे बुझ्न युवराज सफलले अर्को निवेदन दिएका छन् ।

उनले अख्तियार दुरुपयोग अनुसन्धान आयोगमा महान्यायाधिवक्ताले किशोरीको डिम्ब तस्करी, सम्पत्ति शुद्धीकरण तथा संगठित अपराधसँग जोडिएका व्यक्तिविरुद्ध मुद्दा नचलाउने निर्णय गरेको दाबीसहित उजुरी गरेका थिए ।

उनले महान्यायाधिवक्ताका यी दुई विवादित निर्णयसँग सम्बन्धित सम्पूर्ण फाइल झिकाइ अनुसन्धान गर्न र निर्णय प्रक्रियामा संलग्न व्यक्तिमाथि कारबाही गर्न माग गरेका छन्।

सफलले मिति गत पुस ३० गते दर्ता गराएको उजुरीमा महान्यायाधिवक्ता भण्डारीले अनुचित प्रभावमा परेर मुद्दा फिर्ता लिएको र आर्थिक चलखेल भएको आशंका गरिएको उल्लेख थियो।

उक्त उजुरीमाथि हालसम्म के–कस्तो प्रक्रिया अघि बढेको छ भन्ने जानकारी संविधानको धारा २७ तथा सूचनाको हकसम्बन्धी ऐन, २०६४ अनुसार उपलब्ध गराउन माग गरिएको हो। त्यही उजुरीलाई लिएर भण्डारीले सफललाई प्रहरी लगाएर पक्राउ गराएकी थिइन् । तर उनी २४ घण्टामै रिहा भए ।

नाबालिकामाथि जबर्जस्ती करणीसम्बन्धी एक मुद्दामा जिल्ला अदालतले १८ वर्ष कैदको सजाय सुनाए पनि उच्च अदालतले सफाइ दिएको र उक्त फैसलाविरुद्ध सर्वोच्च अदालतमा पुनरावेदन नगर्ने निर्णय भएको समाचार सार्वजनिक भएपछि त्यस निर्णयको सक्कल फाइल झिकाइ अनुसन्धान गर्न पनि उनले माग गरेका छन् ।

निवेदनमा महान्यायाधिवक्ता कार्यालयको भूमिकामाथि प्रश्न उठाउँदै सम्बन्धित सबै निर्णय प्रक्रिया छानबिन गर्न र आवश्यक अनुसन्धान अघि बढाउन आग्रह गरिएको छ। उक्त सम्बन्धमा उनले थप अर्को निवेदन पेश गरेका छन् ।