काठमाडौं– जनमत पार्टीले काठमाडौं लगायत विभिन्न जिल्लामा धोती दिवस मनाएको छ ।

काठमाडौंको माइतीघर लगायत विभिन्न जिल्लामा जनमतले धोती दिवस मनाएको हो । आ–आफ्ना मौलिकता झल्किने धोती, कुर्ता आदि पोसाक लगाएर धोती दिवस मनाउन जनमतका नेताहरू लगायत माइतीघरमा सहभागी भएका थिए ।

उनीहरूले धोती हाम्रो शान हो, मधेसीको पहिचान हो, मधेसी एकता जिन्दाबाद, धोती भनेर हेप्न पाइँदैन, धोती हाम्रो राष्ट्रिय पोसाक हो लगायतका प्लेकार्ड देखाएका थिए ।

सो क्रममा जनमत पार्टीका वरिष्ठ नेता ममता झाले सबै जातजातिको आफ्नै भेसभुसा रहेको र त्यसलाई सबैले आफ्नो सम्पत्ति मान्नुपर्ने बताइन् । उनले भेसभुसाका आधारमा कसैलाई अपमानित गर्न नहुने बताइन् । 

जनमतले जनवरी १ तारिकका दिन हरेक वर्ष धोती दिवस मनाउँदै आएको छ ।