सुनसरी- सुनसरीको वराहक्षेत्र-८ स्थित कोशी माध्यमिक विद्यालय आन्दोलनका कारण साता दिनदेखि बन्द छ । शिक्षक पुनर्वहालीको माग गर्दै विद्यार्थीहरू आन्दोलित छन् । अहिले हतियारधारी प्रहरी विवाद मिलाउन विद्यालय हाताभित्र प्रवेश गरेको छ ।

साना बालबालिका चर्को गर्मीमा नाराबाजी गरिरहेका छन् । अभिभावक गेटबाहिर उभिएका छन् ।

आइतबार विवाद मिलाउने र शिक्षकलाई पुनर्वहाली गर्ने विद्यार्थीलाई आश्वासन दिएका प्रधानाध्यापक सम्पर्कविहीन छन् । सशस्त्र प्रहरी विद्यालय बाहिर हतियारसहित उभिएको छ ।

शिक्षक पुनर्वहालीको माग गर्दै विद्यार्थी आन्दोलनमा उत्रिएपछि प्रहरी प्रशासनले विद्यालय क्षेत्र नियन्त्रणमा लिएको छ ।

वराहक्षेत्र-८ स्थित कोशी माविमा विद्यालयभित्र हतियारधारी जनपद प्रहरी प्रवेश गरेका छन् भने सशस्त्र प्रहरी विद्यालय बाहिर तैनाथ भएको छ ।

कोशी माविबाट काज सरुवा गरिएका शिक्षकको पुनर्वहालीको माग गर्दै विद्यार्थीले आन्दोलन गरेको साता दिन बितेको छ ।

‘फेसबुकमा ‘मेयरका दुई/ तीन वटी श्रीमती…’ लेखेपछि शिक्षकको सरुवा’ गर्न विद्यालयका प्रधानाध्यापक बालकृष्ण अधिकारीले वराहक्षेत्र नगर शिक्षा समितिलाई सिफारिस गरेका थिए । सिफारिसका आधारमा शिक्षक बालकृष्ण बोहोराको सरुवा गर्ने निर्णय भएको थियो ।

उत्पन्न विवाद मिलाउने विषयमा नगर प्रमुख रमेश कार्की मौन छन् । नगरस्तरीय शिक्षा समितिसमेत कानमा तेल हालेर बसेको अभिभावकले गुनासो गरेका छन् ।

बालबालिकासम्बन्धी ऐन, २०७५ ले बालबालिकाको सुरक्षा र हित प्राथमिकताको रूपमा लिएको छ।

कुनै पनि निकाय वा व्यक्तिले बालबालिकाको शैक्षिक वातावरण भङ्ग गर्न नपाउने प्रावधान छ। त्यसैले प्रहरीको उपस्थितिले त्रास उत्पन्न गर्ने, शिक्षण–अध्ययन वातावरण बिगार्ने, बाल अधिकार उल्लंघन गर्ने अवस्था भएमा त्यो कानुनविपरीत हुन्छ भनेको छ ।

फौजदारी संहिता अन्तर्गत, सार्वजनिक स्थान वा शान्त वातावरणमा अनावश्यक रूपमा हतियार प्रदर्शन गर्नु वा आतंक फैलाउनु अपराध मानिन्छ (दफा १२४, १२५) त्यसैले विद्यालय परिसरमा प्रहरी वा अन्यले कारणबिना हतियार प्रदर्शन गर्दै प्रवेश गरेमा कानुनविपरीत हुन्छ।