काठमाडौं – नेपाल चेम्बर अफ कर्मसका अध्यक्ष कमलेशकुमार अग्रवालले विषम परिस्थितिमा आएको आगामी आर्थिक वर्षको बजेट विकासमुखी र महत्वकांक्षी भएको बताएका छन् । नेपाल आर्थिक पत्रकार संघ (नाफिज) ले शनिबार काठमाडौंमा आयोजना गरेको पोस्ट बजेट छलफल कार्यक्रममा उनले यस्तो बताएका हुन् ।

‘आगामी आवको बजेट लगानी प्रवर्धन गर्ने खालको आएको छ, उनले भने, ‘आइटी र प्रविधिलाई ध्यानमा राखिएकोमा खुसी छु, तीन प्रतिशत ब्याजमा युवालाई २० लाख रुपैयाँसम्म ऋण दिने नीति स्वागतयोग्य छ ।’

यो नीतिले विदेशिने युवाको सङ्ख्यामा कमी हुने विश्वास लिएको उनले बताए । पर्यटन क्षेत्रका लागि पनि बजेट राम्रो देखिएको अग्रवालले बताए । त्यसमा हवाई टिकटमा लाग्दै आएको कर हटाएको भए झन राम्रो हुने बताउँदै यसमा सरकारले ध्यान दिनुपर्ने अग्रवालको भनाइ छ ।

उनले चालु कर्जा उपलब्ध गराएकाले अर्थतन्त्रमा सुधार हुने विश्वास लिइएको बताए । अन्तर्राष्ट्रिय मापदण्ड अनुसार नदीजन्य पदार्थ उत्खननका विषय पनि आएकाले यसमा निकै सजग हुनुपर्ने उनको भनाइ छ । भारततर्फ निर्यातमा पनि निकै समस्या भइरहेको बताउँदै उनले यसमा पनि सुधार गर्न आवश्यक रहेको बताए ।

यसैगरी राजश्वको स्रोतमा ध्यान दिन आवश्यक रहेको पनि चेम्बर अध्यक्ष अग्रवालले बताए । ठूला राष्ट्रबाट आउने अनुदानमा कमी आउने देखिँदा अर्थतन्त्रमा असर गर्ने पनि उनको भनाइ छ । यस्तै उनले व्यवसायमा सङ्कुचन भएको अवस्थामा पुनकर्जाको व्यवस्था गर्न आवश्यक रहेको बताउँदै यसबारे मौद्रिक नीतिबाट सम्बोधन हुनुपर्ने बताए ।