काठमाडौं- नेकपा एमालेका अध्यक्ष केपी शर्मा ओलीले पार्टीले अब फागुन २१ को निर्वाचनबाट राष्ट्रिय फैसला दिने दाबी गरेका छन्।

दलहरूले समानुपातिक सूची निर्वाचन आयोगमा बुझाउँदै गर्दा उनले मंगलबार राष्ट्रिय सभा गृहमा आयोजित मदनआश्रित स्मृति प्रतिष्ठानको विचार गोष्ठीलाई सम्बोधनका क्रममा उनले यस्तो बताएका हुन् ।

पार्टीको एघारौँ महाधिवेशन मंसिर २७ गतेदेखि पुस पहिलो सातासम्म गरिसकेकाले अब एमालेले आमनिर्वाचन पर्खिरहेको पनि ओलीले बताएका छन् । यसअघि उनी संसद् पुनर्स्थापनाको जोडबलमा थिए । उनकै जोडबलमा कांग्रेस र एमालेसहितका बहुमत सांसदले भदौ २७ मा भएको विघटनविरुद्ध सर्वोच्चमा रिट हालेका थिए ।

ओलीले निर्वाचन नभएसम्म कुन लोकप्रिय छ भन्ने चर्चा भइरहने बताए । ‘हामी चुनाव पर्खिरहेका छौँ। कहिले होला फागुन २१ मा होला, वैशाखमा होला वा अर्को मंसिरमा होला’, उनले भने, ‘हामी चुनाव पर्खिरहेका छौँ, चुनावबाटै हामी राष्ट्रिय फैसला दिने छौँ ।’

उनले एमाले महाधिवेशनबाट स्पष्ट सन्देश लिएर आफूहरू निर्वाचनमा होमिन लागेको पनि बताएका छन् । ओलीले एमाले हुञ्जेल लोकतन्त्रलाई कसैले पराजित गर्न नसक्ने पनि जिकिर गरे ।

उनले निर्वाचनको खेल मैदानमा रहेका खेलाडीहरूमध्ये उत्कृष्टले जित्ने पनि दाबी गरे । ओलीले सबैतिर एमाले देखेपछि विपक्षीहरू मिल्न लागिरहेको बताएका छन् ।