काठमाडौं- नेकपा एमालेनिकट राष्ट्रिय ट्रेड युनियन महासंघ (जिफन्ट) का केन्द्रीय उपाध्यक्ष कमल गौतमको बिहीबार भैरहवामा भाषण गर्दागर्दै अचानक ढलेर निधन भएको छ।

रुपन्देहीको भैरहवास्थित नेपाल विद्युत् प्राधिकरणको शाखा कार्यालयअगाडि आयोजित उद्योगका मजदुरहरूसहितको धर्ना कार्यक्रमलाई सम्बोधन गरिरहेका बेला ढलेका ६५ वर्षीय गौतमको निधन भएको हो।

भाषण गर्दा गर्दै ढलेका गौतमलाई सभास्थलबाट मणिग्रामस्थित क्रिमसन अस्पतालमा भर्ना गरिएको थियो । तर उक्त अस्पतालका चिकित्सकहरूले गौतमलाई मृत घोषित गरे।

श्रीमती र दुई छोराका पिता उनी रुपन्देहीकै बुटवल उपमहानगरपालिका–३ ज्योतिनगर निवासी हुन् । वि.सं. २०५४ सालदेखि जिफन्ट लागेका उनी एमालेको राजनीतिमा पनि सक्रिय थिए ।

जिफन्टले उद्योगहरूमा गरिएको विद्युत कटौतीको विषयलाई लिएर बिहीबार भैरहवामा धर्ना कार्यक्रम गरेको थियो ।