काठमाडौं – इन्डियन प्रिमियर लिग (आईपीएल) मा दिल्ली क्यापिटल्सले लगातार दोस्रो जित निकालेको छ ।

आइतबार दिउँसो भएको खेलमा दिल्लीले सनराइजर्स हैदरावादलाई ७ विकेटले हराएको हो । हैदरावाले दिएको १६४ रनको लक्ष्य दिल्लीले १६ ओभरमा तीन विकेटको क्षतिमा भेट्टायो ।

दिल्लीका लागि ओपनर फाफ डु प्लेसिसले ५० रनको योगदान गरे । त्यस्तै ज्याक फाजर मगर्कले ३८ रन बनाए ।

केएल राहुलले १५ रन, अभिषेक पोरेल ३४ रन बनाए । हैदरावादका लागि जिसान अन्सारीले ३ विकेट लिए । चार ओभर बलिङ गरेका उनले ४२ रन खर्चिए ।

त्यसअघि विशाखापट्टनममा टस जितेर ब्याटिङ रोजेको हैदरावाद १८.४ ओभरमा अलआउट हुनुअघि १६३ रन बनायो। उसका लागि अनिकेत वर्माले ४१ बलमा ६ छक्का प्रहार गर्दै ७४ रन बनाए ।

दिल्लीका लागि मिचेल स्टार्कले ५ विकेट लिए । ३.४ ओभर बलिङ गरेका उनले ३५ रन खर्चिए । यस्तै कुलदीप यादवले ३ विकेट लिए । हैदरावादको यो दोस्रो हार हो ।