ढाका– भूकम्पको राहत तथा उद्धारकार्यमा सहयोग पुर्‍याउन बङ्गलादेशको सशस्त्र बलको उद्धार टोली आइतबार विशेष उडानमार्फत म्यान्मा प्रस्थान गर्ने भएको छ ।

बङ्गलादेशको सशस्त्र बलको अन्तरसेवा जनसम्पर्क (आईएसपीआर) ले शनिबार एक विज्ञप्ति जारी गर्दै टोली आइतबार म्यान्मा प्रस्थान गर्ने जानकारी दिएको हो ।

बङ्गलादेशी सशस्त्र बलले आपत्कालीन औषधि, राहत सामग्री, उद्धार कार्य र चिकित्सा सहायता उपलब्ध गराउने जनाइएको छ ।

म्यान्मामा शुक्रबार ७.७ म्याग्निच्युडको भूकम्प गएको थियो । भूकम्पका कारण भौतिक संरचनाका साथै व्यापक रूपमा मानवीय क्षति पुगेको छ । 

राज्य प्रशासन परिषद्को मिडिया समूहले आइतबार उपलब्ध गराएको जानकारीअनुसार अहिले (आइतबार मध्यान्न) सम्म एक हजार ६४४ जनाको मृत्यु भएको, तीन हजार ४०८ जना घाइते भएका छन् भने १३९ जना हराइरहेका छन् ।