काठमाडौं– सभामुख देवराज घिमिरेले गत शुक्रबार राजावादीहरूले तीनकुनेमा गरेको हिंसात्मक घटना लोकतन्त्रमाथिको प्रहार भएको बताएका छन् ।

संसद् भवन नयाँबानेश्वरमा आज भएको राजनीतिक दलका प्रमुख सचेतकसँगको बैठकमा घिमिरेले उक्त घटनाका विषयमा संसद्मा छलफल र बहस गर्ने वातावरण बनाउन दलहरूलाई आग्रह गरे ।

राष्ट्रमाथि भएको घटनाबारे छलफल गरेर संसद जीवन्त रहेको महसुस गराउन अपिल गर्दै सभामुखले अधिवेशन सञ्चालन नभएको अवस्थामा पनि सदन सञ्चालन गर्नुपर्ने अवस्थामा सदन अवरोध कुनै पनि हालतमा उचित नहुने बताए ।

विद्युत प्राधिकरणका कार्यकारी निर्देशकबाट कुलमान घिसिङलाई बर्खास्त गरिएको विषयमा प्रतिपक्षी दलहरूले संसद अवरोध जारी राखेपछि सभामुखले समस्या समाधानका लागि प्रमुख सचेतकहरुसँग छलफल गरेका हुन् ।

नेकपा एमालेका मुख्य सचेतक महेश बर्तौलाले प्रधानमन्त्रीले भोलि बस्ने प्रतिनिधिसभा बैठकमा सम्बोधन गर्ने बताए । उनले संसद् अवरोध खुलाउने विषयमा प्रधानमन्त्री र विपक्षी दलका नेताबीच टेलिफोन संवाद भएको जानकारी दिए ।