काठमाडौं– २१ फागुनमा हुने निर्वाचनका लागि समानुपातिकतर्फको बन्द सूची बुझाउने अन्तिम दिन आज निर्वाचन आयोगमा चटारो देखिएको छ । 

कान्तिपथस्थित आयोगको कार्यालयमा बिहानदेखि नै विभिन्न दलका प्रतिनिधिहरूको आवतजावत बढेको छ ।

निर्वाचन आयोगले समानुपातिक उम्मेदवारको बन्द सूची बुझाउन हिजो र आज गरी दुई दिनको समय दिएको थियो । समयसीमा सकिन लाग्दा पनि ठूला दलहरू नेपाली कांग्रेस, नेकपा एमाले, नेकपा माओवादी केन्द्र र राष्ट्रिय स्वतन्त्र पार्टी (रास्वपा) ले भने अहिलेसम्म सूची बुझाएका छैनन् ।

आयोगका अनुसार अन्तिम समयसम्म सूची नबुझाएमा कानुनी व्यवस्था अनुसार कारबाही हुने छ । यसैबीच, केही साना तथा क्षेत्रीय दलहरूले भने समयमै बन्द सूची दर्ता गराइसकेका छन् ।

सूची बुझाउने समयसीमा आज कार्यालय समयभित्रै सकिने भएकाले ठूला दलहरू अन्तिम क्षणमा आयोग पुग्ने सम्भावना रहेको आयोग स्रोतले जनाएको छ ।