काठमाडौं– उपराष्ट्रपति रामसहायप्रसाद यादवले तराई मधेसका सीमान्तकृत समुदायलाई मूलधारमा ल्याउन थप प्रयास आवश्यक रहेको बताएका छन् ।

सोमबार ललितपुरमा राष्ट्रिय दलित आयोगको पञ्चवर्षीय रणनीतिक योजना सार्वजनिक तथा उजुरी व्यवस्थापन प्रणालीको शुभारम्भ गर्दै उपराष्ट्रपति यादवले तराई मधेसका दलित समुदाय अझै पनि शिक्षा, स्वास्थ्य र राजनीतिक पहुँचबाट बाहिर रहेको उल्लेख गरे । उनीहरूलाई मूलधारमा ल्याउन आयोगले अझ सक्रिय भूमिका निर्वाह गर्नुपर्ने उनले बताए ।

उपराष्ट्रपति यादवले दलित समुदायभित्रै विद्यमान विभेद र छुवाछुतको अवस्थाप्रति चिन्ता व्यक्त गर्दै यसलाई अन्त्य गर्न आयोगको अग्रसरता अपरिहार्य रहेको बताए । समाजमा रहेका विसंगति र भेदभाव हटाउने चुनौती समाधान गर्न राष्ट्रिय दलित आयोग प्रतिबद्ध भएर अघि बढ्नुपर्ने उनको भनाइ थियो ।

पञ्चवर्षीय रणनीतिक योजनाले आयोगको संस्थागत सुदृढीकरण, नीति तथा कार्यक्रमको प्रभावकारी कार्यान्वयन तथा जातीय भेदभाव र छुवाछुत अन्त्यमा सहयोग पुग्ने विश्वास उपराष्ट्रपति यादवले व्यक्त गरे ।