काठमाडौं– देशभरीका सरकारी तथा निजी स्वास्थ्य संस्थाहरूमा कार्यरत नर्सहरूले बुधबार बिहान १० बजेदेखि १२ बजेसम्म २ घण्टा सेवा ठप्प पारेका छन् । 

निजी अस्पताल र शिक्षण संस्थामा कार्यरत नर्सहरूको न्यूनतम पारिश्रमिक सरकारले तोकेअनुसार हुनुपर्ने माग गर्दै आन्दोलनमा उत्रिएका नर्सहरूको माग पुरा गर्नका लागि दवाव दिन भन्दै नेपाल नर्सिङ सङ्घले कात्तिक २ गते आन्दोलनको नयाँ कार्यक्रम घोषणा गरेको थियो । 

जसमा कात्तिक ४ गतेदेखि ११ गतेसम्म हातमा कालोपट्टि बाँधेर काम गर्ने, १२ गतेदेखि १८ गतेसम्म दैनिक दुई घण्टा सेवा रोक्ने घोषणा गरेको थियो । संघले स्वास्थ्य तथा जनसङ्ख्या मन्त्रालयको कार्यदलले १८ कात्तिकमा बुझाउने प्रतिवेदनपछि नयाँ कार्यक्रम घोषणा गर्ने जनाएको छ।

नर्सहरूले उठाएको मागलाई सम्बोधन गर्न स्वास्थ्य तथा जनसङ्ख्या मन्त्रालयले कार्यदल गठन गरेको छ। जसको कार्यावधि छठपछि सात दिन तोकिएको छ ।

सङ्घको आह्वानमा नर्सहरू ४ कात्तिकबाट हातमा कालोपट्टी बाँधेर सेवामा रहेका थिए । नर्सहरू सेवा तथा सुविधासहितका विषयमा १५ सूत्रीय माग राखेर आन्दोलनमा रहेका छन् । 

यता निजी स्वास्थ्य संस्थाका सञ्चालकहरू भने उनीहरूले माग गरेको पारिश्रमिक दिन नसक्ने अडानमा रहेका छन् ।