काठमाडौं– प्रधानमन्त्री केपी शर्मा ओलीले चीन भ्रमणका क्रममा रूसका राष्ट्रपति भ्लादिमिर पुटिनसँग भेटवार्ता गर्ने भएका छन् ।

शनिबारदेखि हुन गइरहेको चीनको पाँच दिने भ्रमणका क्रममा प्रधानमन्त्री ओलीले चिनियाँ राष्ट्रपति सी चिनफिङसँगै रूसी राष्ट्रपति पुटिनसँग भेटवार्ता गर्ने भएका हुन् ।

भ्रमणका क्रममा माल्दिभ्सका राष्ट्रपति डा. मोहमद मिज्जु, कम्बोडियाका प्रधानमन्त्री डा. सोमदेक मोहा बोरभोर तिपाहदे हुन महानेट, लाओ जनप्रजातान्त्रिक गणतन्त्रका प्रधानमन्त्री सोनेसाइ सिपानडोन र भियतनामका प्रधानमन्त्री फाम मिन चिङसँग पनि छुट्टाछुट्टै भेटवार्ता तय भएको छ ।

शांघाई सहयोग संगठन (एससीओ)को शिखर सम्मेलनमा भाग लिन प्रधानमन्त्री ओली चिनियाँ राष्ट्रपति सीको मैत्रिपूर्ण निमन्त्राणमा नेपाली प्रतिनिधि मण्डलको नेतृत्व गर्दै चीन भ्रमणमा जान लागेका हुन् ।

भ्रमणका क्रममा उनी बेइजिङमा आयोजना हुने फासिवादविरुद्धको विश्वयुद्ध र जापानी अतिक्रमणविरुद्धको चिनियाँ जनताको प्रतिरोधी युद्धमाथिको विजयको ८०औँ वार्षिकोत्सव समारोहमा पनि सहभागी हुने छन् ।

उक्त कार्यक्रममा उत्तर कोरियाली शासक किम जोङ उन पनि सहभागी हुँदैछन् । प्रधानमन्त्री ओलीको किमसँग भने भेटवार्ता तय भएको छैन । चीनका अनुसार ५० भन्दा बढी देशले वार्षिकोत्सव समारोहमा सहभागिता जनाउने छन् ।