काठमाडौं- आमजनता पार्टीका अध्यक्ष प्रभु साहले सरकारले बिहीबार ल्याएको बजेटले मुलुकको समस्या सम्बोधन नगर्ने दाबी गरेका छन् ।

संसद् भवन परिसरमा पत्रकारहरुसँग कुरा गर्दै उनले यस्तो प्रतिक्रिया दिएका हुन् । बजेट नेताहरूको भुँडी भर्ने खालको रहेको आरोप पनि उनले लगाए । बजेट वितरण पनि पूरै असमान भएको टिप्पणी उनको थियो ।

‘यो बजेट नेपाललाई उजाड एवम् जनतालाई निराश बनाउने खालको छ । हिजो हदबन्दीको सम्पत्ति राज्यको हुन्थ्यो, आज फुकुवा भयो’, उनले भने ।

साहले नेपालको पुँजी खुलेआम विदेश लैजान पाउने व्यवस्थासमेत बजेटले गरेको भन्दै आक्रोश व्यक्त गरेका छन् ।

उनले प्राकृतिक सम्पदाको खुलेआम दोहन गर्ने बाटो खोलिदिएको भन्दै बजेटमाथि आलोचना गरे । साहले गरिव, श्रमजिवीलाई बजेटले बिर्सिएको बताउँदै वैदेशिक रोजगारमा रहेका युवालाई दुःखी तुल्याएको आरोप लगाए ।