बेइजिङ– चीनले स्वच्छ र दिगो ऊर्जा विकास गर्न हाइड्रोजन प्रविधिलाई उच्च प्राथमिकता दिँदै आएको छ। हालै सम्पन्न चीन अन्तर्राष्ट्रिय हाइड्रोजन कंग्रेस (सिआइएचसी) सन् २०२५ मा यस प्रविधिका नयाँ उपलब्धिहरू प्रदर्शन गरिए, जसले भविष्यमा हाइड्रोजन ऊर्जा महत्वपूर्ण भूमिका खेल्ने देखाएको छ।

देशको पहिलो मानवविहीन हाइड्रोजन-इलेक्ट्रिक हाइब्रिड खानी ट्रक इनर मंगोलियाको शेंगली कोइलाखानीमा सञ्चालनमा आएको छ। यो ट्रक हाइड्रोजन र ब्याट्रीद्वारा सञ्चालित छ, जसले वार्षिक एक हजार टन कार्बन उत्सर्जन घटाउन मद्दत गर्छ। यो प्रविधि जाडो मौसममा समेत राम्रोसँग काम गर्ने क्षमता राख्छ।

चीन सरकारले हाइड्रोजन ऊर्जा प्रवर्द्धन गर्न ठोस नीति अपनाउँदै सन् २०२१-२०३५ रणनीति ल्याएको छ। सन् २०२५ सम्म नवीकरणीय ऊर्जा स्रोतबाट एक लाख देखि  दुई लाख टन हाइड्रोजन उत्पादन गर्ने लक्ष्य राखिएको छ। साथै, सन् २०३० सम्म हाइड्रोजन उद्योगलाई व्यवस्थित रूपमा विस्तार गर्ने योजना बनाइएको छ।

देशभरि विभिन्न ठाउँमा हाइड्रोजन प्रविधिको प्रयोग बढिरहेको छ। हालै पूर्वी चीनको यान्ताइ शहरमा समुद्री हाइड्रोजन उत्पादन केन्द्र निर्माण सम्पन्न भएको छ, जसले भविष्यमा लामो दूरीका पानीजहाजहरूका लागि हरित इन्धन आपूर्ति गर्न सक्छ। यस्तै, शाङ्घाइ लगायतका शहरहरूमा हाइड्रोजन बस, ट्याक्सी, ट्रक तथा अन्य सवारिसाधन परीक्षणका रूपमा सञ्चालन भइरहेका छन्।

तर, हाइड्रोजन प्रविधि अझै केही चुनौतीहरू सामना गरिरहेको छ। उच्च लागत, प्रविधिगत सीमाहरू, र पूर्वाधार अभावका कारण यसको व्यापक प्रयोगमा केही कठिनाइ देखिएको छ। हाल विश्वभर हरित हाइड्रोजन उत्पादन एक प्रतिशतभन्दा कम रहेको छ, जसले थप अनुसन्धान र लगानी आवश्यक रहेको देखाउँछ।

चीनले आफ्नो १५औं पञ्चवर्षीय योजनामा हाइड्रोजन उद्योगलाई अझ प्रभावकारी बनाउने योजना अघि सारेको छ। सरकारले प्रविधि सुधार, उद्योगको दिगो विकास, र अन्तर्राष्ट्रिय सहकार्यलाई प्राथमिकता दिँदै हाइड्रोजन ऊर्जा क्षेत्रको विस्तार गर्ने लक्ष्य राखेको छ। यसले चीनको हरित ऊर्जा लक्ष्य हासिल गर्न महत्त्वपूर्ण योगदान दिनेछ।