जनकपुरधाम– मठमन्दिरको जग्गामा नक्सा पास बिना नै अवैधरुपमा भौतिक संरचना निर्माण गर्नेहरूविरुद्ध जनकपुरधाम उपमहानगरपालिका उत्रेपछि मेयर र वडा अध्यक्षबीच मनमुटाव सुरु भएको छ ।

जनकपुरधामको सिया रघुनाथ सदनको जग्गामा नक्सा पासबिनै अवैधरूपमा भूमाफियाहरुले खुलेआम गरिरहेको भवन निर्माण कार्य उपमहानगरपालिकाले रोकेपछि जनकपुरधाम उपमहानगरपालिकाका मेयर मनोज शाह र वडानम्बर ८ का वडाध्यक्ष दिनेश सिंहबीच मनमुटाव सुरु भएको हो । 

जग्गा रजिस्ट्रेसन आफ्नो नाममा नरहेको र नक्सा पास बिना घर निर्माणको क्रम बढेपछि अवैध रूपमा भवन निर्माण नगर्न भन्दै उपमहानगरपालिकाको नगर प्रहरीले निर्माण कार्यमा प्रयोग हुने उपकरणहरू मंगलबार उठाएर लगेको थियो ।

अब पनि भवन निर्माणको कार्य नरोके स्थानिय सरकार सञ्चालन ऐनको दफा ३९ बमोजिम अवैध संरचना भत्काउन उपमहानगरपालिका तयार रहेको प्रमुख मनोज साहले जानकारी दिए । 

मेयर साहले भने,‘म अवैध निर्माण कार्य विरुद्ध छु । कुनैपनि हालतमा सार्वजनिक जग्गामा अवैध रूपमा निर्माण कार्य हुनुहुँदैन । वडाध्यक्षले नै असहयोग गरिरहेका छन् ।’

मेयर साहले अवैध निर्माण कार्य रोकेपछि  उनको चौतर्फि प्रशंसा हुन थालेको छ । सिया रघुनाथ सदनका महन्थ नामदेव शरणले जग्गा कब्जा गरी बलजफती अवैध संरचना बनाइरहेका १६ जनाको विरुद्ध उपमहानगरपालिकाको कार्यालयमा उजुरी दिएका छन् ।

 यता वडाध्यक्ष सिंहले आफू निर्माण कार्यको पक्षधर नरहेको तर, यसरी निर्माण कार्य रोक्नु पनि उचित नभएको बताए । 

उनले अवैध निर्माण कार्य भइरहेको ठाउँमा मेयरको समेत जग्गा रहेको आरोप लगाउँदै भने, ‘मेयरले मसँग बुझेर गर्नु पर्थ्यो,समन्वय गर्नुपर्ने थियो । तर, उनले मलाइ कुनै सोधखोज नै नगरी यसरी गरेका हुन । बिना नक्साको घर निर्माण त कुनै हालतमा हुनुहुँदैन तर ज-जसले भवन बनाइरहेका छन् उनीहरूसँग लिएको पैसा पनि फिर्ता हुनुपर्छ ।’ वडाध्यक्ष सिंहले थपे, ‘मेयरसाहेवलाइ त्यसै स्थानमा २–३ कठ्ठा जग्गा पाइसके पछि एक्सनमा आइसकेका छन् । त्यसमा धेरै ठुलठुला मान्छेहरूको जग्गा छ ।’

सिया रघुनाथ सदन मन्दिरको नियमित पूजापाठ र महन्थ पूजारीको भोजन तथा अतिथिको स्वागत सत्कारका लागि धान गहुँ उब्जाउन कुनै बेला दाताले दिएको यस जग्गाको चलन चल्तीको भाउ १९ करोड रुपैयाँ भन्दा बढी रहेको अनुमान छ । 

प्रतिधुर ५ लाख भन्दा बढी चलन चल्तीको भाउ रहे पनि भूमाफियाहरुको एक समूहले जग्गा धनीलाई थाहै नदिई झासामा पारि घर बनाउनेहरूसँग प्रतिधुर साढे एक देखि दुई लाख रुपैयाँ सम्म असुलेको छ ।

यो पनि पढ्नुहोस्-

सिया रघुनाथ सदनमा अवैध भवन निर्माणमा रोक

मन्दिरको जग्गामा भूमाफियाको नजर, सिया रघुनाथ सदनमा धमाधम ठडिँदै भवन