काठमाडौं- नेत्रविक्रमचन्द विप्लव नेतृत्वको दल नेकपाका प्रवक्ता खड्कबहादुर विश्वकर्माले निर्वाचन आयोगमा दल दर्ताको निवेदन दिएपछि पार्टीका लागि ऐतिहासिक दिन भएको बताएका छन्। 

दल दर्ताका लागि निवेदन दिएपछि पत्रकार सम्मेलन गरेर प्रकाण्डले संसदीय निर्वाचन प्रणालीमा आफ्नो उपस्थिति रहने भएकाले आजको दिनलाई ऐतिहासिक दिन भनेको बताए । 

प्रकाण्डले अहिलेको आवश्यकतालाई नीतिलाई, जनताको मागअनुसार वस्तुस्थिति अनुसार आफूलाई नयाँ ठाउँमा उभ्याउनुपर्ने माग समेत गरेका छन्।

उनले जनताको मुद्दाको कुरा, सिस्टमको कुरा चाहनाको कुरालाई आफै फैसला गर्ने सबैभन्दा प्रजातान्त्रिक विधि निर्वाचन भएको दाबी समेत गरेका छन्।

‘आजको दिन नेपालको राजनीतिमा एउटा ऐतिहासिक र विशेष दिन हुनेछ। निर्वाचनमा सहभागी हुने पहिलो दलको अभ्यास हामीले योपटक गर्दैछौँ। पार्टीको विधानमा यो नयाँ अभ्यास हो यसकारण मैले सबैको बीचमा यो ऐतिहासिक दिन हुन्छ भनेको हुँ।’ प्रकाण्डले अगाडि भने, ‘जनताको मुद्दाको कुरा सिस्टमको कुरा र चाहनाको कुरा आफै फैसला गर्ने सबैभन्दा प्रजातान्त्रिक माध्यम र विधि निर्वाचन नै हो। वस्तुस्थिति अनुसार हामिले  नयाँ ठाउँमा हामीलाई उभ्याउनुपर्नेछ।’