भक्तपुर- आफूलाई सामाजिक अभियन्ता बताउने आशिका तामाङलाई जिल्ला अदालत भक्तपुरले ५ दिन कैद सजाय र ५ सय रुपैयाँ जरिवाना गराउने फैसला सुनाएको छ ।

भक्तपुरको साँगास्थित झोलुङ्गे पुल तर्न शुल्क असुलिएको विरोध गर्दा उनीविरुद्ध मुद्दा परेको थियो ।

आशिकाले शुल्कको विरोध गर्दै रसिद बुक च्यातिदिएकी थिइन् । बिहीबार न्यायाधीश विश्वनाथ भट्टराईको इजलासले उनलाई कैद र जरिवाना सुनाएको हो ।

उनलाई ८ हजार ३ सय रूपैयाँ जाहेरवालालाई क्षतिपूर्ति भर्न पनि फैसला भएको छ । यस्तै, पीडित राहतकोषमा दुई-दुई सय बुझाउनुपर्ने भएकाे छ।

पुलमा रकम उठाएको विरोध गर्दै रसिद बुक च्यातिदिएपछि पक्राउ परेकी उनलाई प्रहरीले आपराधिक उपद्रव गर्न नहुने कसुरमा मुद्दा चलाएको थियो ।

उक्त कसुरको मुद्दामा प्रारम्भिक सुनुवाइ गर्दै जिल्ला अदालत भक्तपुरका न्यायाधीश सन्तोषप्रसाद पराजुलीको इजलासले आशिकालाई २०८१ माघ १८ गते २० हजार धरौटीमा छाड्ने आदेश दिएको थियो ।

उनीविरुद्ध प्रहरी वृत्त जगातीले आपराधिक उपद्रव गर्न नहुने कसुरमा अनुसन्धान गरेको थियो ।

आशिकाले २०८१ असोज ४ गते सूर्यविनायक नगरपालिका–९ बाट वडा नं. १० मा जाने झोलुङ्गे पुल चढ्दा लाग्ने शुल्कबारे विरोध गर्दै सामाजिक सञ्जालमा भिडियो हालेकी थिइन् ।

उनले त्यसपछि साँगाको झोलुङ्गे पुल तर्दा लिइने २० रुपैयाँ शुल्कको रसिद बुक पनि जलाइदिएकी थिइन् । त्यसपछि आशिकाविरुद्ध सूर्यविनायक नगरपालिकाले प्रहरी वृत्त जगातीमा आपराधिक उपद्रवको जाहेरी दिएको थियो ।

प्रहरी वृत्त गौशालामा अभद्र व्यवहारको कसुरमा मुद्दा खेपेकी उनलाई जिल्ला प्रशासन कार्यालय काठमाडौंले १० हजार धरौटीमा रिहा गर्न आदेश दिएको थियो । त्यसपछि उनलाई भक्तपुर प्रहरीको जिम्मा लगाएर मुद्दा चलाइएको थियो ।

सच्याइएको** : यसै समाचारमा आशिका तामाङलाई अदालतले सफाइ दिएको व्यहोरासहितको समाचार प्रकाशित हुन पुगेकामा क्षमायाचनासहित सच्याएका छौँ । -सम्पादक