घोराही– खोटो बेचेर वन समूहले १८ लाख रुपैयाँ बढी आम्दानी गरेका छन् । जिल्लाका चार सामुदायिक वनले १८ लाख ३७ हजार छ सय ५७ रुपैयाँ आम्दानी गरेका हुन् ।

डिभिजन वन कार्यालयका अनुसार आर्थिक वर्ष २०८१/८२ मा ७५ हजार २५६ किलो खोटो बेचेर उक्त रकम आम्दानी भएको हो । खोटो तार्पिन र  रङ बनाउन प्रयोग गरिन्छ ।  यो खोटो बाँके र कपिलवस्तुका उद्योगले खरिद गर्दै आएका छन् । 

आर्थिक वर्ष २०८०/८१ को तुलनामा आव २०८१/८२ मा एक लाख ९६ हजार ७५६ रुपैयाँ किलो कम खोटो सङ्कलन  भएको छ । आव २०८०/८१ मा जिल्लाका सात वटा सामुदायिक वन समूहबाट दुई लाख ७२ हजार १२ किलो सल्लाको खोटो सङ्कलन भएको थियो । 

आर्थिक वर्ष २०७९/८० मा ७८ हजार किलो सल्लाको खोटो सङ्कलन गरी बिक्री गर्दा नौ लाख ३९ हजार २७ रुपैयाँ आम्दानी भएको थियो । खोटो सङ्कलन गर्ने सामुदायिक वन समूह घटेसँगै आय पनि घटेको हो ।  रासस