काठमाडौं – राष्ट्रिय प्रजातन्त्र पार्टी (राप्रपा) नेपालका अध्यक्ष कमल थापाले भ्रष्ट शासकबाट देशलाई मुक्त तुल्याउने र हिन्दू अधिराज्य पुनस्थापना गर्ने लक्ष्य प्राप्तिको निमित्त निकट भविष्यमै पुनः आन्दोलन शुरु हुने बताएका छन् ।

पार्टी आवद्ध भातृ संगठन राष्ट्रिय युवा मोर्चा नेपालको प्रशिक्षण कार्यक्रमलाई सम्बोधन गर्दै थापाले आन्दोलन सफल पार्न कम्तीमा ५ हजार प्रतिवद्ध स्वयंसेवक तयार गर्न युवा मोर्चालाई निर्देशन समेत दिए ।

मुलुकमा कुशासन, ब्रम्हलुट, मनपरितन्त्र हाबी भएको भन्दै सर्बसत्ताबादी चिन्तनबाट शासकहरु अघि बढिरहेकोले जनताले यसको प्रतिवाद गर्ने समेत उल्लेख गरे । नेपाली जनताको भावनालाई कुल्चियर गणतन्त्र , धर्मनिरपेक्षता र संघीयता जबर्जस्ती लादिएको भन्दै थापाले बिदेशिले बोकाईदिएको भारी बोक्न तयार भएका दलहरु अहिले पनि बिदेशी शक्ति रिझाउन मै तल्लिन भएको आरोप लगाए ।

राजसंस्था भन्ने बित्तिकै केही केही मान्छे झस्किने गरेको भन्दै थापाले राजसंस्था र प्रजातन्त्र सङ्गै जाने भएकोले कोहि चिन्तित हुनु नपर्ने स्पष्ट पारे । राजा र जनता मिलेर मुलुकको आर्थिक ,सामाजिक , राजनीतिक कायापलट गर्ने दुरगामी सोच र योजना आफुहरुसङ्ग भएको समेत थापाले बताए ।

युवा पुस्ताले मनपरितन्त्र नसहने भन्दै अब हुने आन्दोलनमा युवाहरुको सकृय सहभागिता जरुरी भएको उनको धारणा थियो । कार्यक्रममा राप्रपा नेपालका उपाध्यक्ष तेजकुमार कुरुङ्गवाङ्ग, युवा मोर्चाका सह(अध्यक्ष गृष्मबिक्रम मल्ल,लाक्पा शेर्पा , सरोज तिमल्सिना , शक्ति दर्शनधारी ,मनोज तिमल्सिना , बिनोद कपाली लगायतले बोलेका थिए ।