काठमाडौं– समाजवादी मोर्चा नेपालले तीनकुनेसहित आसपासका क्षेत्रमा भएका आपराधिक क्रियाकलापमा संलग्नलाई कानुनी दायरमा ल्याएर कारबाही गर्न माग गरेको छ । 

प्रदर्शनीमार्गमा शुक्रबार आयोजना भएको जनसभापछि विज्ञप्ति जारी गरेर मोर्चाले आपराधिक र आततायी तत्त्वलाई यथाशीघ्र कानुनी दायरामा ल्याएर कडाभन्दा कडा कारबाही गर्न सरकारसँग माग गरेको हो ।

राजावादी समूहले शुक्रबार तीनकुने क्षेत्रमा गरेको उच्छृङ्खल र अराजक कार्यप्रति निन्दा गर्दै मोर्चाले भनेको छ, ‘यस कार्यमा संलग्न आपराधिक र आततायी तत्त्वलाई यथाशीघ्र कानुनी दायरामा ल्याइ कडा भन्दा कडा कारबाही गर्न सरकारसँग माग गर्दछौँ । राजनीतिक दलको कार्यालय र नागरिकको जनधनको सुरक्षा गर्न हामी सरकारसँग जोडदार माग गर्दछौँ ।’

मोर्चाले गणतन्त्रको सम्बन्धन र राष्ट्रिय स्वाधीनताको संरक्षणका लागि आयोजित वृहत् जनसभा पचासौँ हजार जनताको सहभागितामा भव्यतापूर्वक सम्पन्न भएको पनि जनाएको छ । 

‘जनताको यो शालीन, सक्रिय र उत्साहपूर्ण सहभागितालाई समाजवादी मोर्चा नेपाल हार्दिक आभारसहित धन्यवाद ज्ञापन गर्दछ,’ विज्ञप्तिमा भनिएको छ ।