काठमाडौं– नेपाली कांग्रेसले सरकारलाई नागरिकको धनजनको सुरक्षाका लागि थप सतर्कताका साथ रणनीतिक योजना बनाउन सुझाव दिएको छ । 

कांग्रेसका सूचना, सञ्चार तथा प्रचार विभाग प्रमुख मीन विश्वकर्माले सरकारलाई थप सतर्कताका साथ रणनीतिक योजना बनाउन सुझाव दिएका हुन् । 

‘व्यवस्था परिवर्तनका नाममा गरिएका आपराधिक गतिविधिको जिम्मेवारी सम्बन्धित पक्षले लिनै पर्छ,’ उनले फेसबुकमार्फत् भनेका छन्, ‘सरकारले नागरिकको धनजनको सुरक्षाकाका लागि थप सतर्कता साथै रणनीतिक योजना बनाउनुपर्दछ ।’

लोकतन्त्रमा आफूले चाहेको राजनीतिक प्रणालीका पक्षमा मत वा समर्थन माग्न र मन नपरेको प्रणालीका विरुद्ध शान्तिपूर्ण विरोध प्रदर्शन गर्नु स्वाभाविक मानिने विश्वकर्माको भनाइ छ । 

उनले भनेका छन्, ‘तर, आज राजावादीको नाम र अराजकतावादीको नेतृत्वमा काठमाडौंको तीनकुनेमा भएको निजी सम्पत्तिमा आगजनी, तोडफोड र हिंसात्मक आक्रमणका तथा आगो निभाउन गएको दमकललाई समेत तोडफोड र अवरोध गरेका घटना निन्दनीय र भत्सर्नायोग्य छन् । यसले ज्ञानेन्द्र शाहको नियत, उद्देश्य र प्रवृति आजै उदाङ्गो भएको छ ।’