काठमाडौं- सरकारका प्रवक्ता एवम् सञ्चार तथा सूचना प्रविधिमन्त्री जगदीश खरेलले राजनीतिक भेटघाट तीव्र बनाएका छन् ।

शुक्रबार बिहान नेपाली कांग्रेसका सभापति शेरबहादुर देउवालाई महाराजगञ्ज पुगेर भेटेका उनले मध्याह्न नेकपा एमालेका अध्यक्ष केपी शर्मा ओ‌लीलाई भक्तपुरको गुण्डू पुगेर भेटेका छन् ।

निर्वाचनको वातावरण बनाउन भन्दै सरकारले दलहरूका शीर्ष नेताहरूसँगको संवादलाई तीव्र बनाएको छ। उच्चस्तरीय राजनीतिक संवाद समितिका सदस्यसमेत रहेका खरेलले दलहरूलाई विश्वासमा लिने प्रयास थालेका हुन् ।

खरेलले महाराजगञ्जस्थित निवासमा भेट गरेपछि सभापति देउवाले निर्वाचनमा भाग लिने निर्णय आफ्नो पार्टीले गरेको बताएका थिए। उनले कांग्रेसको प्राथमिकतामा पनि निर्वाचन नै भएको जवाफ खरेललाई दिएका थिए ।
 
सभापति देउवाले स्वतन्त्र एवम् निष्पक्ष रूपमा निर्वाचन सम्पन्न गर्न सरकारले उचित वातावरण बनाउनुपर्ने सुझाव दिएको राजनीतिक संवाद समितिका सदस्यसमेत रहेका मन्त्री खरेलले बताए।

खरेलले शुक्रबार नै दिउँसो नेपाल कम्युनिस्ट पार्टीका संयोजक पुष्पकमल दाहाल प्रचण्डसँग उनको निजी निवास खुमलटारमा भेट्ने कार्यक्रम छ ।