काठमाडौं- वरिष्ठ पत्रकार कनकमणि दीक्षितले भदौ २३ र २४ गते जस्तो ठूलो विनाश र विध्वंस नेपालको इतिहासमा कहिल्यै नभएको बताएका छन् ।

पूर्वराष्ट्रपति विद्यादेवी भण्डारीको उपस्थितिमा काठमाडौंमा भएको अन्तर्क्रिया कार्यक्रममा दीक्षितले जेन-जीका नाममा नेपालमा पहिले लुटेर सार्वजनिक र निजी संरचनामा आगो लगाइएको बताए ।

‘यो आन्दोलनपछि नेपालको अन्तर्राष्ट्रिय छवि धुमिल भएको छ। नेपालमा अन्तर्राष्ट्रिय हस्तक्षेप हुँदा नेताहरूले राम्रोसँग काम गर्न सकेका थिएनन्। अब त झनै त्यो बढ्ने अवस्था छ। हामी यहाँबाट उठ्न नसक्ने अवस्था छ’, उनले भने, ‘भदौ २३ गतेको गोलीकाण्ड र २४ गतेको विध्वंशको छानबिन हुनुपर्छ । गोली चलाउन आदेश दिनेलाई छानबिन हुनुपर्छ । विध्वंशमा संलग्नलाई कारबाही हुन सकेमा नेपालको अन्तर्राष्ट्रिय छवि सुध्रिन्छ ।’

उनले जेन-जीका नाममा सरकार ढाल्ने र राज्य व्यवस्था ढाल्ने दुवै कोसिस भयो । सरकार पल्टिँदा नेपालको राज्य व्यवस्था केही ढलेको उनले बताए ।

‘लिच्छवी, मल्ल, शाह र राणाकालमा पनि नेपालमा यो किसिमको विध्वंश भएको थिएन’, उनले भने, ‘नेपालले विश्वलाई नै क्लाइमेट क्राइसिसमा नेतृ्त्व गर्नुपर्छ भनिरहेका थियौँ। तर हामी आफैं अब गम्भीर संकटमा परेका छौँ।’

उनले आउने दिनमा हेर्दा अन्तर्राष्ट्रिय रुपमा पनि नेपालको छवि बदनाम भएको दोहोर्‍याएका छन् । ‘हरेक घटनाको छानबिन हुनुपर्छ । निर्वाचन समयमा हुनैपर्छ । अनुसन्धान पनि समयमा र भरपर्दो हुनुपर्छ । गोलीकाण्ड र विध्वंशका दुवै घटनामा संलग्नलाई कारबाही गर्न सक्नुपर्छ ।’