काठमाडौं- राष्ट्रिय प्रजातन्त्र पार्टी नेपाल (राप्रपा नेपाल) ले आगामी पुस १५ गते केन्द्रीय समिति बैठक बोलाएको छ।

बैठक पुस १५ गते दिउँसो १ बजे काठमाडौंको सुकेधारास्थित नवदुर्गा पार्टी प्यालेसमा बस्ने राप्रपा नेपालका महामन्त्री राजाराम बर्तौलाले जानकारी दिए।

बर्तौलाका अनुसार बैठक पुस १६ गते आयोजना हुने राप्रपा र राप्रपा नेपालबीचको ‘पार्टी एकता घोषणा सभा’ लाई भव्य रूपमा सफल बनाउने विषयमा केन्द्रित हुनेछ।

यसअघि राप्रपा र राप्रपा नेपालबीच पार्टी एकता गर्ने सहमति पत्रमा राप्रपाका अध्यक्ष राजेन्द्र लिङ्देन र राप्रपा नेपालका अध्यक्ष कमल थापाले हस्ताक्षर गरिसकेका छन्।

महामन्त्री बर्तौलाले केन्द्रीय समिति बैठकमा अध्यक्ष कमल थापाले पार्टी सञ्चालनका क्रममा प्राप्त सहयोग र सद्भावका लागि सबै नेताहरूलाई धन्यवाद तथा आभार व्यक्त गर्ने कार्यक्रम पनि रहेको जानकारी दिए।