मुंबई – बलिउडका वरिष्ठ अभिनेता धर्मेन्द्रको ८९ वर्षको उमेरमा निधन भएपछि फिल्म उद्योग र प्रशंसकहरू शोकमग्न छन्।

करिब ५० वर्षअघि रिलिज भएको चर्चित फिल्म शोले मा वीरुको भूमिका निभाएका धर्मेन्द्र बलिउडका कालजयी कलाकारमध्ये एक थिए। सोही फिल्ममा जयको भूमिका निभाएका अमिताभ बच्चनले  सोसल मिडियामा धर्मेन्द्रप्रति श्रद्धाञ्जली व्यक्त गर्दै आफूले एक बहादुर र दिग्गज योद्धा गुमाएको बताएका छन्।

अमिताभले धर्मेन्द्रको केवल दमदार उपस्थिति मात्र नभई करुणा, सादगी र पञ्जाबको माटोसँग जोडिएको स्वभावका कारण उनी महान व्यक्तित्व भएको उल्लेख गरेका छन्। धर्मेन्द्रको निधनपछि जीवनमा भरिन नसक्ने शून्यता छाएको उनको भनाइ छ।

पञ्जाबमा जन्मिएका धर्मेन्द्रले १९६० को दशकमा फिल्म क्षेत्रमा प्रवेश गरेका थिए। आफ्नो करिअरमा उनले फूल और पत्थर, शोले, चुपके चुपके, सत्यकम, यादों की बारात लगायत थुप्रै चर्चित फिल्महरूमा यादगार अभिनय प्रस्तुत गरेका थिए। पर्दाभित्र रोमान्सदेखि वीर भूमिकासम्म सहज रूपमा निभाउने उनको क्षमता बलिउडमा प्रशंसनीय मानिन्छ।

फिल्म बाहिर पनि धर्मेन्द्रको सरल स्वभाव, हाजिरजवाबी र प्रशंसकप्रतिको माया उनलाई सबैको मनमा प्रिय बनाएको थियो। बलिउडले एक महान कलाकार गुमाउँदै गर्दा धर्मेन्द्रले छोडेको कलात्मक विरासत र सदाबहार भूमिकाहरू सधैं स्मरणीय रहने बताइएको छ।