चितवन- मुग्लिन–नारायणगढ सडकखण्डअन्तर्गत चितवनको इच्छाकामना गाउँपालिका–५, तुइन खोला पुलनजिकको पहिरो करिब पन्छाइसकिएको छ।

विभिन्न ६ वटा मेशिनले एकसाथ यो पहिरो पन्छाइरहेका छन् । अहिले पहिरोस्थलमा बत्तीकोसमेत व्यवस्था गरेर लगातार पहिरो पन्छाइँदैछ ।

पहिरो राति ९ बजेसम्म पन्छाइसकेर गाडी नारायणगढ र मुग्लिन दुवैतर्फबाट गाडी खुलाउने तयारी गरिएको छ।

काम गर्ने क्षेत्र साँघुरो भएकोले गर्दा एक पटकमा दुवैतर्फबाट ६ वटा उपकरणले मात्रै काम गर्न सक्ने अवस्था छ । सडक डिभिजन चितवनले बिहीबार राति नै गाडी खुलाउने तयारी गरेको छ।

पहिरोको थुप्रोमा ढुंगाहरूको मात्रा बढी भएको र स–साना तिखा ढुंगाहरूका कारण टायर पन्चर हुने, ढुंगाले लागेर अपरेटर घाइते हुनेजस्ता समस्याहरूले गर्दा सोचेअनुसारको प्रगति हुन सकेको थिएन । तर एक्साभेटर र लोडर अपरेटरले दिनरात एकसाथ काम गरेर यो पहिरो सोचेभन्दा पहिले पन्छाएका हुन् ।