काठमाडौं– अनलाइन सञ्चारमाध्यम अब सूचना विभागबाटै दर्ता गर्न सकिने भएको छ ।

बिहीबार बसेको अन्तरिम सरकार मन्त्रिपरिषदको बैठकले यस्तो निर्णय गरेको सरकारका प्रवक्ता एवम् सञ्चार तथा सूचना प्रविधि मन्त्री जगदीश खरेलले बताएका छन् ।

‘अब अनलाइन दर्ता तथा नवीकरण जिल्ला प्रशासन कार्यालयबाट गर्नुपर्ने छैन । सूचना विभागबाटै गर्न सकिनेछ,’ उनले बिहीबार सिंहदरबारमा भने ।

यसअघि गत साउनमा केपी शर्मा ओली नेतृत्वको तत्कालीन सरकारले अनलाइन सञ्चारमाध्यमको दर्तासम्बन्धी नयाँ व्यवस्थाअनुसार जिल्ला प्रशासन जानु पर्ने नियम ल्याएको थियो ।

त्यसबेला सरकारले केही नेपाल ऐन संशोधनमार्फत छापाखाना तथा प्रकाशनसम्बन्धी ऐन, २०४८ मा नयाँ व्यवस्था थप गरेसँगै अनलाइन सञ्चारमाध्यमको दर्ता प्रक्रिया जिल्ला प्रशासन कार्यालयमार्फत हुने भएको थियो ।