काठमाडौं– मुग्लिन–नारायणगढ सडक खण्डअन्तर्गत तुइन खोलाको ६० प्रतिशत पहिरो पन्छ्याइएको छ ।  

पहिरो पन्छाउन नारायणगढ तर्फबाट एक्साभेटर-१, लोडर-१ र मुग्लिन तर्फबाट २ वटा  लोडर, १ वटा  एक्साभेटर उपकरणहरू प्रयोग गरि निरन्तर रुपमा काम भइरहेको प्रहरीले जनाएको छ । साथै दुवैतर्फ १-१ वटा ब्याकप लोडर तैनाथ अवस्थामा रहेका छन् । 

एक प्रहरीले भने, ‘पहिरो पन्छाउने क्रममा नारायणगढ साइडतर्फ ठूलाठाला ढुङ्गाहरूको कारण केही कठिनाइ भएतापनि हामीसँग भएका उपकरणहरूले पूर्ण क्षमताका साथ काम गरिरहेका छन् । पहिरो सफा गर्ने कार्य हालसम्म करिब ६० प्रतिशत सम्पन्न भएको छ ।’ 

उनका अनुसार अहिले पहिरो रोकिएकाले आज रातभरि नै पहिरो पन्छाउने काम जारी रहने छ । निरन्तर रुपमा कार्य गर्न सकिएको खण्डमा सम्भवतः आज रातिसम्ममा पूर्ण रुपमा पहिरो हटाई आवागमन सञ्चालनमा ल्याउने आँकलन गरिएको छ ।