पोखरा- नेकपा एमालेसम्वद्ध युवा संघ नेपालमा निर्वाचन हुने निश्चित भएको छ ।

हालसम्म महाधिवेशन भएका ११ वटा संगठनमा एमालेले सर्वसम्मत नेतृत्व चयन गर्ने गरेको थियो । तर राष्ट्रिय युवा संघ नेपालको पोखरामा जारी १०औं महाधिवेशनमा निर्वाचनबाटै नेतृत्व छान्ने पक्का भएको छ ।

निर्वाचन समितिका अनुसार आइतबार अपरान्ह ४ देखि साँझ ६ बजेसम्म मनोनयन दर्ताको समय तोकिएको छ ।

महाधिवेशनबाट सर्वसम्मत दोहोरिन खोजेका क्षितिज थेवेलाई महासचिव सुमन पुरीले चुनौती दिएका छन् ।

एमाले अध्यक्ष केपी शर्मा ओली र पूर्वराष्ट्रपति विद्यादेवी भण्डारीसमेत क्षितिजलाई जिताउन लागेको चर्चाबीच सुमन पुरीले चुनावमै जानुपर्ने अडान लिएका थिए ।

पार्टी अध्यक्ष ओलीको निर्देशन भन्दै थेवेलाई अध्यक्ष बनाउन जनसंगठन समन्वय संयन्त्रका संयोजक भानुभक्त ढकाल लागेका थिए । तर सुमनले सर्वसम्मत नेतृत्व चयनलाई अस्वीकार गरिदिए । युवा संघको नेतृत्व निर्वाचनबाटै चयन हुने पक्का भएको छ ।

यता ओलीनिकट नेताहरू अध्यक्षमा थेवे र महासचिवमा महेश चौलागाईंलाई जिताउने निर्देशनसहित लागेका छन् ।

मतदानका लागि शनिबार नै विद्युतीय भोटिङ मेसिन पोखरा लगिएको छ। पोखरामा शुक्रबारदेखि जारी १० औं महाधिवेशनमा अध्यक्षमा पुरीले दाबी नछोड्दा निर्वाचन हुने भएको हो ।

उता उपमहासचिव राजन थापालाई जिताउन नेताहरू सक्रिय छन् । संघका पूर्वअध्यक्षहरू महेश बस्नेत, निरुदेवी पाल, राजीव पहारी, किरण पौडेल र रमेश पौडेल पनि थेवेलाई जिताउन जुटेका छन् ।

अध्यक्षका दाबेदार। वर्तमान उपाध्यक्षहरू महाराज गुरुङ, कृष्णहरि केसी र प्रकाश गौतम पछि हट्दा अब दुईजनाबीच प्रतिस्पर्धा हुन लागेको छ । महासचिव पुरीले प्यानल बनाएरै चुनावी प्रतिस्पर्धा गर्दैछन् ।