काठमाडौं– नेपाल टेलिकमले कालिकोटको मान्मदेखि जुम्ला हुँदै मुगुको गमगढीसम्म पहिलो पटक अल डाईलेक्ट्रिक सेल्फ सपोर्टीङ (एडीएसएस) प्रविधिमा आधारित अप्टिकल फाइबर विस्तार गरी सूचना महामार्ग सञ्चालनमा ल्याएको छ ।

टेलिकमका अनुसार देशको दुर्गम क्षेत्रमासमेत दूरसञ्चार सेवा विस्तार एवं स्तरोन्नति गर्ने अभियानअन्तर्गत विस्तार गरेको सूचना महामार्गले कालिकोट, जुम्ला, मुगुलगायतका क्षेत्रमा मोबाइल ब्रोडब्याण्ड र फाइबर सेवाको गुणस्तर तथा क्षमता वृद्धि हुनुका साथै भविष्यमा सञ्चालनमा आउने नयाँ प्रविधिको लागिसमेत महत्त्वपूर्ण आधार निर्माण भएको छ ।

माइक्रोवेव रेडियो लिङ्कमार्फत हाल सञ्चालनमा रहेका राजमार्ग आसपासका कम्पनीका फाइबर इन्टरनेट (एफटीटीएच) तथा मोबाइल सेवासँग सम्बन्धित उपकरणहरूका साथै एनटीटीभी  ब्रान्डको टेलिभिजन सेवासमेत चैत ८ गतेबाट अप्टिकल फाइबर मार्फत सञ्चालनमा ल्याइएको टेलिकमले जनाएको छ ।