काठमाडौं– सरकारले नेपाल विद्युत् प्राधिकरणका प्रबन्ध निर्देशक कुलमान घिसिङलाई बर्खास्त गरेको पुष्टि गरेको छ ।

सोमबार बसेको मन्त्रिपरिषद् बैठकका निर्णय सार्वजनिक गर्दै सञ्चार तथा सूचना प्रविधिमन्त्री पृथ्वी सुब्बा गुरुङले घिसिङलाई बर्खास्त गरिएको पुष्टि गरेका हुन् । 

‘नेपाल विद्युत् प्राधिकरणका कार्यकारी निर्देशक कुलमान घिसिङलाई पदबाट हटाइने निर्णय पनि भएको छ,’ उनले भने, ‘नेपाल विद्युत् प्राधिकरणको कार्यकारी निर्देशक पदमा श्री हितेन्द्रदेव शाक्य, ललितपुरलाई नियुक्त गर्ने निर्णय पनि भएको छ ।’ 

यसअघि सोमबार बेलुकी बैठकका निर्णयबारे संक्षिप्त जानकारी दिने क्रममा उनले कुलमानबारे जबाफ दिन इन्कार गरेका थिए । 

उनले बैठकबाट चुहिएको सूचनाका बारेमा आफूलाई कुनै जानकारी नै नभएको बताएका थिए ।  

यस्तो थियो संवाद :

पत्रकार : कुलमान घिसिङलाई हटायो भन्छन् नि ।
सञ्चारमन्त्री : को ले, कुलमानले भन्या ?
पत्रकार : होइन, स्रोतले भन्या ।
मन्त्री : खै सरकारलाई त थाहा छैन !
पत्रकार : हटायो भन्ने खबर छ नि ?
मन्त्री : मैले के भन्छु, त्यो कुरा सोध्नु न ।
पत्रकार : त्यही कुरा सुन्न त बसेका छौँ नि अघिदेखि ।