काठमाडाैं – भारत र फ्रान्सले संयुक्त नौसैनिक अभ्यास सञ्चालन गरेका छन् । यी दुई मुलुकका नौसेनाले अरब सागरमा अभ्यास गरेको भारतीय सञ्चार माध्यमले जनाएका छन् ।

टाइम्स अफ इण्डियाका अनुसार अभ्यासलाई ‘वरुण २०२५’ नाम दिइएको छ । यी दुई मुलुकबीच सन् २००१ देखि वरुण नौसैनिक अभ्यास सञ्चालन हुँदै आएको छ । अभ्यासमा भारतले लडाकु विमान वाहक आईएनएस विक्रान्त युद्धपोत र फ्रान्सले आणविक ऊर्जाबाट सञ्चालन हुने लडाकु विमानवाहक युद्धपोत सार्ल दे गोल परिचालन गरेको जनाइएको छ ।

यस अभ्यासले दुई मुलुकबीच रणनीतिक साझेदारीलाई थप मजबुत बनाउने अपेक्षा गरिएको भारतीय समाचार संस्था एएनआईले जनाएको छ । अभ्यासमा सहभागी नौसैनिकहरुले पनडुब्बी प्रतिरोधी युद्धकार्य र आपसी सैन्य सहयोगसम्बन्धी प्रशिक्षण पनि लिएको एएनआईले उल्लेख गरेको छ ।