काठमाडौं– कोशी प्रदेशकी उपसभामुख सिर्जना दनुवारले समाजलाई बालविवाह मुक्त गराउन वर्तमान कानुन नै प्रभावकारी रहेकाले यसलाई कार्यान्वयन गर्न जरुरी रहेको बताएकी छन् । 

आइतबार विराटनगरमा आयोजना गरिएको बालविवाह सम्बन्धी राष्ट्रिय जाँचबुझ परामर्श कार्यक्रममा बोल्दै उपसभामुख दनुवारले बालविवाह मुक्त गराउन विद्यमान कानून कार्यान्वयनमा देखिएका समस्या र बाधकका रुपमा रहेका पक्षहरूलाई गहन रुपमा ध्यान दिनुपर्ने समेत बताइन् । उनले बालविवाह अन्त्यका लागि सामाजिक सचेतना पनि उत्तिकै आवश्यक रहेको बताइन् । 

राष्ट्रिय मानव अधिकार आयोग कोशी प्रदेशले आयोजना गरेको सो कार्यक्रममा बालविवाहका कारण बालबालिकाहरूमा शारीरिक, मानसिक र मनोवैज्ञानिक प्रभाव पर्ने भएकाले सम्बन्धित सरकारले चासो र चिन्ता लिनुपर्ने सरोकारवालाहरूले बताएका छन् । 

नेपाल सरकारले सन् २०३० सम्ममा बालविवाह अन्त्य गर्ने घोषणा गरेको छ । पछिल्लो एक वर्षमा तराई मधेश र कर्णाली प्रदेशमा १८ वर्षमुनीका ५० प्रतिशत किशोरीहरूको बालविवाह भएको तथ्यांक रहेको छ ।