काठमाडौं- अशोक राई नेतृत्वको जनता समाजवादी पार्टी फुटेको छ। मधेशवादी दलसँग या नेपाली कम्युनिस्ट पार्टीसँग एकता गर्ने विवादमा यो पार्टी फुटेको हो ।

नेताहरूबीच मतभेद हुँदा एउटा समूह पुष्पकमल दाहाल प्रचण्ड संयोजक रहेको नेकपामा मिसिने निश्चित भएको छ। यो विवादमा नेताहरूबीच मतभेद चर्किएपछि संघीय परिषद् अध्यक्ष राजेन्द्र श्रेष्ठसहित ६ जना नेताहरूले नेपाली कम्युनिष्ट पार्टीमा समाहित हुने निर्णय गरेका छन्।

जसपाका संघीय परिषद् अध्यक्ष श्रेष्ठ, उपाध्यक्षद्वय रणध्वज लिम्बू र परशुराम बस्नेत, केन्द्रीय सल्लाहकार समिति अध्यक्ष दुर्गामणि देवान, केन्द्रीय विज्ञपरिषद् अध्यक्ष डा. पुष्पराज राजकर्णकार र केन्द्रीय अनुसन्धान आयोगका अध्यक्ष कृष्णबहादुर घजु नेकपामा समाहित हुन राजीनामा दिएका छन् ।

उनीहरूले आइतबार संयुक्त विज्ञप्ति जारी गरेर नेकपा एकताका सन्दर्भमा कार्यकारिणी बैठक नबोलाएको भन्दै पार्टीबाट राजीनाम दिएर कात्तिक १९ गते ब नेको दलमा समाहित हुने निर्णय गर्न पुगेको बताएका छन् ।

विचार मिल्ने राजनीतिक परिवर्तनका शक्तिहरूसँग मिलेर उपलब्धिहरूको रक्षा र थप उपलब्धि प्राप्तिका लागि संघर्ष गर्नुपर्ने अवस्था आएकाले आफूहरूले नेकपासँग एकता गरेको जानकारी अध्यक्ष राईलाई गराइएको छ ।

जसपामा प्रदीप यादव, नवलकिशोर शाह लगायतका नेताहरूले मधेसी दलसँग एकता तथा मोर्चा कसेर जानुपर्ने अडान राखेका थिए। नेकपासँग एकता गर्न अशोक राई पनि इच्छुक रहे पनि अहिले त्यो अवस्था बनेन । यही विवादमा राईला छाडेर श्रेष्ठसहितका नेता प्रचण्डतिर लागेका हुन् ।