सोलुखुम्बु – सोलुखुम्बुको माप्यदुधकोशी गाउँपालिका–३ वाकुमा बिहीबार एक बोलेरो जीप दुर्घटना हुँदा तीन जनाको मृत्यु भएको छ।

प्रहरीका अनुसार बोलेरो करिब पाँच सय मिटर तल खसेको हो। घटनास्थलमा तीन जना महिलाको शव फेला परेको छ। गाडीमा कति जना सवार थिए भन्ने यकिन विवरण भने अहिलेसम्म खुलेको छैन।

सवारी चालक बोल्न नसक्ने अवस्थामा फेला परेका कारण घाइते र सवार यात्रुको संख्या पुष्टि हुन बाँकी रहेको प्रहरीले जनाएको छ। मृतकहरूको सनाखत पनि अहिलेसम्म हुन सकेको छैन।

उक्त बोलेरो सोलुखुम्बुको महाकुलुङतर्फ जाँदै थियो। त्यसैले मृतक र घाइतेहरू पनि सो क्षेत्रकै हुने अनुमान गरिएको छ।

घाइतेहरूलाई उद्धार गरी सोताङ अस्पताल पठाइएको छ। तत्कालै वाकु प्रहरी टोलीले उद्धार कार्य सुरु गरेको र सोताङबाट प्रहरी निरीक्षक नेतृत्वको टोली पनि घटनास्थलतर्फ गएको जिल्ला प्रहरी कार्यालय सोलुखुम्बुका नायब उपरीक्षक मनोजित कुँवरले जानकारी दिए। प्रहरीका अनुसार घटनास्थलमा उद्धार कार्य अहिले पनि जारी छ।