एजेन्सी– नाटोले पूर्वी युरोपमा भइरहेका हवाई क्षेत्र उल्लङ्घनप्रति गम्भीर चिन्ता व्यक्त गर्दै रुसलाई ती कार्य तत्काल रोक्न चेतावनी दिएको छ ।

गत साता इस्टोनियाको हवाई क्षेत्रमा रूसी लडाकु विमानले १२ मिनेटसम्म अनधिकृत प्रवेश गरेपछि नाटोले आपतकालीन बैठक बोलाएको थियो ।

त्यसपछि मंगलबार नाटोका ३२ सदस्य राष्ट्रहरूले संयुक्त वक्तव्य जारी गर्दै भने, ‘रुसले यस्ता खतरनाक र उत्तेजनात्मक गतिविधिहरूको पूर्ण जिम्मेवारी लिनुपर्छ । यस्ता कार्यहरूले दुर्घटना, गलत निर्णय र ज्यानको जोखिम बढाउँछन् । यी कार्यहरू तुरुन्त बन्द गरिनुपर्छ ।’

‘हामी सबै प्रकारका खतराबाट जोगिन अन्तर्राष्ट्रिय कानुनअनुसार आवश्यक सबै सैन्य वा गैर–सैन्य उपाय अपनाउन तयार छौँ ।’

रुसी हवाई उल्लङ्घनलगत्तै नाटोले लडाकु विमान परिचालन गरेको थियो । यसअघि पोल्याण्डको आकाशमा रूसी ड्रोन देखिएपछि पनि नाटोले ती ड्रोन खसालेको थियो ।

यस्ता घटनाहरू दोहोरिन थालेपछि नाटोले पोल्याण्ड, रोमानिया, लाट्भिया, लिथुआनिया र फिनल्याण्डजस्ता पूर्वी सीमामा पर्ने राष्ट्रहरूको सुरक्षालाई थप मजबुत बनाउने निर्णय गरेको छ ।

नाटोले भनेको छ,’रुसका यस्ता गैरजिम्मेवार गतिविधिहरूले युक्रेनप्रतिको हाम्रो समर्थन कमजोर हुने छैन ।’

इस्टोनियाले नाटोको संस्थापक सन्धिको धारा ४ अन्तर्गत आपतकालीन परामर्शको माग गरेको थियो ।

यस धारा अनुसार, कुनै सदस्य राष्ट्रलाई आफ्नो भू-सम्प्रभुता वा सुरक्षामा खतरा महसुस भएमा तत्काल बैठक बोलाउन सकिन्छ । रुसले सन् २०२२ मा युक्रेनमाथि आक्रमण गरेपछि यो तेस्रोपटक धारा ४ प्रयोग गरिएको हो । नाटोको धारा ५ अनुसार, यदि कुनै सदस्यमाथि आक्रमण हुन्छ भने बाँकी सबै राष्ट्रले मिलेर उसको रक्षा गर्छन् ।

यो धारा अहिलेसम्म मात्र एकपटक सन् २००१ को सेप्टेम्बर ११ को आक्रमणपछि प्रयोग गरिएको हो ।