जनकपुरधाम- जसपा नेपाल र प्रतिपक्षी नेकपा माओवादी केन्द्रले मधेस प्रदेशसभा बैठक अवरुद्ध पारेका छन् ।

प्रदेशसभा बैठक सुरु भएलगत्तै माओवादी संसदीय दलका नेता भरत प्रसाद साहले बैठक चल्न नदिने चेतावनी दिए । उनले मुख्यमन्त्री कूटनीतिक मर्यादाविपरीत विदेश गएको, कमिशन लिएर पालिकालाई सशर्त बजेट दिने गरेको, संघका कर्मचारीसँग मोटो रकम लिएर जिम्मेवारी दिने गरेको लगायतका आरोपमाथि मुख्यमन्त्रीले जवाफ दिनुपर्ने माग गरे ।

जसपा नेपालका संसदीय दलका नेता तथा पूर्व मुख्यमन्त्री सरोज कुमार यादवले सरकारले जिल्लास्थित कार्यालयको योजनाहरू मन्त्रीको सचिवालयबाट वितरण हुने गरेकोमा आपत्ति जनाए । उनले भने, ‘प्रदेशसभा सदस्यहरूले डेढ करोड र ५ करोडको योजना पाए कि पाएनन् भन्ने विषय पनि छ । यसका लागि संसदीय छानबिन समिति बनाउनुपर्छ ।’

माओवादी र जसपा नेपालका सांसदहरू संसद् अवरुद्ध पारेपछि सभामुख मण्डलले बैठक १० मिनेटका लागि स्थगित गरेका छन् ।