काठमाडौं– चिसोले बिरामी परेपछि प्रधानमन्त्री केपी शर्मा ओली बिहीबार पनि बालुवाटारमा आराम गरिरहेका छन् ।

मंगलबार बेलुका एउटा पार्टीमा भाग लिएर मध्यराति सरकारी निवास फर्किएका प्रधानमन्त्रीको घाँटीमा समस्या देखिएको थियो । घाँटीमा समस्या भएर स्वर भासिएपछि प्रधानमन्त्रीलाई चिकित्सकहरूले आराम गर्न सुझाएका छन् ।

मंगलबार रातिदेखि नै समस्या भएपछि ओलीले बुधबार बालुवाटारमा आराम गरेका थिए । तर भासिएको स्वर नखुलेपछि बिहीबार पनि उनी बालुवाटारमै भेटघाट बन्द गरेर आराम गरिरहेका छन् ।

बिहीबारका लागि तय भएका ओलीका कार्यक्रम सबै रद्ध भएका छन् । बिरामी परेपछि ओली बुधबार सशस्त्र प्रहरी बलको २४औँ वार्षिकोत्सव समारोहमा सहभागी भएनन् ।

सशस्त्र प्रहरीको २४ औं स्थापना दिवसमामा गृहमन्त्री रमेश लेखक प्रमुख अतिथि भए । काठमाडौं बाहिर रहेका लेखकलाई स्थलमार्गबाट बोलाएर सशस्त्रको कार्यक्रममा प्रमुख अतिथि बनाइएको थियो ।

प्रधानमन्त्री सहभागी हुने गरी बिहीबारका लागि तय भएका कार्यक्रम पनि रद्ध भएका छन् । ओली बिहीबार बुटवल-पाल्पा सडकखण्डको सिद्धबाबा सुरुङ मार्ग ब्रेक थ्रु कार्यक्रममा सहभागी हुन जाने तालिका थिए । तर बिरामी परेका कारण उनी ब्रेक थ्रु कार्यक्रममा जान पाएनन् ।

मंगलबार बेलुका ओलीले सरकारी निवास बालुवाटारमा नेकपा एमालेको सचिवालय बैठक राखेका थिए । त्यस बैठकले पूर्वउपाध्यक्ष वामदेव गौतमसँग सहकार्य गर्दै जाने निर्णय लिएको छ। उक्त बैठकपछि एउटा भोजमा गएका ओली त्यहाँबाट फर्किएपछि बिरामी परेका हुन् ।