काठमाडौँ- भारत र चीनबीच हालै भएको लिपुलेक व्यापारिक नाका सञ्चालन गर्ने सहमतिप्रति समाजवादी मोर्चा, नेपालले गम्भीर आपत्ति जनाएको छ।

नेकपा माओवादी केन्द्र नेतृत्वको मोर्चाले लिपुलेक, लिम्पियाधुरा र कालापानी क्षेत्र नेपालको अभिन्न अंग भएकाले त्यहाँ कुनै पनि प्रकारको सहमति नेपालको अनुमतिबिना गर्न नहुने स्पष्ट गरेको छ।

मोर्चाले जारी गरेको वक्तव्यमा ऐतिहासिक प्रमाण र दुवै पक्षीय सहमति अनुसार लिपुलेक नेपालकै भूभाग भएको भन्दै भारतीय पक्षले त्यहाँ निरन्तर अतिक्रमण गर्दै आएको उल्लेख गरिएको छ।

वक्तव्यमा भनिएको छ, ‘नेपालको सार्वभौमिकता माथि गम्भीर आघात पुर्‍याउने गरी लिपुलेकबारे भारत र चीनबीच भएको सहमति नेपालको भूमिमा फिर्ता व्यापार खोल्ने योजनाबद्ध प्रयास हो, जसलाई नेपालले अस्वीकार गर्छ।’

समाजवादी मोर्चाले नेपालको भूमिमा परनिर्भर शक्तिहरूको सम्झौता नेपाली जनताको हितविपरीत हुने भन्दै विरोध जनाएको छ।

वक्तव्यमा सीमा सम्बन्धी विवादलाई सरकारले गम्भीरतापूर्वक कूटनीतिक पहलमार्फत समाधान गर्नुपर्ने र नेपाल सरकार मौन बसेको खण्डमा जनआन्दोलनमार्फत विरोध गर्ने चेतावनी दिइएको छ। वक्तव्यमा पुष्पकमल दाहाल प्रचण्ड, माधवकुमार नेपाल, उपेन्द्र यादव र महिन्द्र राय यादवको हस्ताक्षर छ।