काठमाडौं- नेकपा एमालेको जारी केन्द्रीय कमिटी बैठकमा केन्द्रीय सदस्हरूले बोलिसकेर अन्य नेताले जवाफ दिइसकेपछि अध्यक्ष केपी शर्मा ओलीले लामो सम्बोधन गरिरहेका छन् ।

एकजना केन्द्रीय सदस्यका अनुसार बैठकमा १३१ जनाले पार्टी विधान र समसामयिक बिषयमा आफ्ना धारणा राखे ।

बैठकमा त्यसपछि केन्द्रीय निकायका प्रमुखहरूले बोलेका छन् । त्यसपछि प्रधानमन्त्रीसमेत रहेका ओलीले बैठकका निर्णय सुनाउने क्रममा लामो सम्बोधन गरेका हुन् । उनले यो तीन दिने बैठकको घोषणा पनि सार्वजनिक गर्नेछन् ।

यो पटक एमालेमा सचिवालय र पोलिटब्युरो सदस्यले बोलिसकेको कमिटीमा बोलिसकेकाहरूलाई केन्द्रीय सदस्यसमक्ष आफ्ना धारणा राख्न रोक लगाइएको छ। त्यहीकारण बोल्न समय माग्दा पनि स्थायी कमिटी सदस्य कर्णबहादुर थापालाई ओलीले समय दिएनन् ।

यसअघिका एमाले केन्द्रीय कमिटी बैठकमा निर्णय सार्वजनिक गर्ने चलन थियो । यो पराम्परागत चलन छाडेर पहिलो पटक एमालेले केन्द्रीय कमिटी बैठकको पनि `घोषणा पत्र´ सार्वजनिक गर्दैछ । जसलाई ओलीले सार्वजनिक गर्दैछन् ।