सुर्खेत– हुम्ला जिल्ला नाम्खा गाउँपालिका–६ तिल गाउँमा हिमपहिरो पीडितलाई कर्णाली प्रदेश सरकारले आठ दिनपछि राहत पठाएको छ । मुख्यमन्त्री यामलाल कँडेलको निर्देशनमा आठ दिनपछि हिमपहिरो पीडित कर्णाली प्रदेशको आन्तरिक मामिला तथा कानुन मन्त्रालयले राहत पठाएको हो ।

जेठ १ गते राती हिमपहिरोमा परी जोखिममा रहेका स्थानीयहरूको लागि तत्काल राहतका सामग्री पठाइएको आन्तरिक मामिला तथा कानुन मन्त्रालयका प्रवक्ता उत्तम गौतमले जानकारी दिए । उनका अनुसार आज बिहान ११ बजे सुर्खेतबाट आवश्यक राहत सामग्रीहरू त्यसतर्फ पठाइएको छ । 

जिल्ला प्रशासन कार्यालय, हुम्लाले माग गरे बमोजिम पाँच सेट टेन्ट (अस्थायी घर), बिस क्वीन्टल खाद्यान्न, अठार सेट सोलार र म्याट्रेस लगायतका राहतका सामग्रीहरू सम्बन्धित क्षेत्रमा पठाइएको प्रवक्ता गौतमले बताए ।