बाजुरा – सुदूरपश्चिम प्रदेशका मुख्यमन्त्री कमलबहादुर शाहले प्रदेश सरकार भ्रष्टाचार नियन्त्रण र सुशासन कायम गर्न प्रतिबद्ध रहेको बताएका छन् ।

सङ्घ, प्रदेश र स्थानीय तहका कार्यालय प्रमुख तथा स्थानीय तहका प्रमुखसँगको छलफलका लागि यहाँ आउनुभएका उहाँले प्रदेश सरकारले कमिसनका आधारमा आयोजना बाढिएको प्रमाण भेटिएमा कुनै पनि हालतमा कार्यान्वयन नगर्ने प्रतिबद्धता जनाए ।

सुदूरपश्चिम प्रदेशको मुख्यमन्त्री कार्यालयद्वारा आज मार्तडीमा आयोजित छलफलमा सहभागी हुन यहाँ पुग्नुभएका मुख्यमन्त्री शाहले प्रदेश सरकारले गरेका कामको जानकारी दिँदै जनताकेन्द्रित काम गर्न तीनै तहका सरकारबीच समन्वय र सहकार्य आवश्यक रहेकामा जोड दिए ।

तीनै तहको सरकारबीच समन्वय र सहकार्य नहुँदा विभिन्न बाधा आउने गरेकाले आवश्यक समन्वयको खाँचो औँल्याए । उनले कमिसनबाट आएका प्रदेशका आयोजना अगाडि नबढाउने पुनः प्रतिबद्धता जनाउँदै कसैसँग ती आयोजनाको तुलना नगर्ने पनि दाबी गरे ।

मुख्यमन्त्री शाहले भने, “सङ्घ, प्रदेश र स्थानीय तहलार्ई बलियो बनाउने हामी सबैको दायित्व हो ।” प्रदेश संरचना आएको आठ वर्षपछि जिल्लास्तरका पालिका प्रमुख र कार्यालय प्रमुखसँग अन्तरक्रिया गर्नु पनि विकासको एक सकारात्मक कार्यको सुरुआत भएको उनले टिप्पणी गरे ।

प्रदेश सरकारले हरेक जिल्लामा गरेका बहस, छलफल र अन्तरक्रियाले सकारात्मक बाटोमा लैजान मद्दत पुगेको मुख्यमन्त्री शाहको भनाइ छ । प्रदेश सरकारमा भएका बेथिति र सुधारका विषयमा सबै लाग्नुपर्नेमा उहाँले जोड दिए ।