काठमाडौँ– नेकपा माओवादी केन्द्रले सरकार सञ्चालनको डेढ महिनासम्म पनि नेताको कार्यालय र निवास हेर्न सरकार नपुगेको भन्दै आपत्ति जनाएको छ।

मंगलबार निर्वाचनको विषयमा प्रधानमन्त्री सुशीला कार्कीले आह्वान गरेको सर्वदलीय संवादमा नेकपा माओवादी केन्द्रकी नेतृ पम्फा भुसालले यसबारे सरकारको ध्यानाकर्षण गराएकी हुन्।

भदौ २४ गतेको जेनजी आन्दोलनमा नेताका निवास, पार्टी कार्यालय र सरकारी संरचना ध्वस्त भएका थिए।

उनले निर्वाचनमा सहभागी हुन आफ्नो पार्टी तयार रहेको तर शान्ति सुरक्षाको प्रत्याभूति सरकारले गराउनुपर्ने बताइन्।

‘सरकार डेढ महिना हुँदासम्म क्षतिग्रस्त दलका कार्यालय र नेताको निवासमा पुग्न सकेन भने कसरी सुरक्षाको प्रत्याभूति हुन्छ?,’ उनले भनिन् ‘नेकपा माओवादी केन्द्रले चुनावमा सहभागी हुने विषयमा त निर्णय नै गरिसकेको छ। दलहरुले पनि चुनावको वातावरण बनाउनुपर्छ भनेर भनिसकेको अवस्था छ। तर सरकारले पनि त्यसको वातावरण बनाउनुपर्छ। दलसँग संवाद सुरुवात भएको छ। यसलाई निरन्तरता दिनुपर्छ।’