काठमाडौँ- नेपाली कांग्रेसका ६ शीर्ष नेताहरू संवादका लागि फेरि सक्रिय भएका छन् ।

उनीहरू आइतबार बिहान नेता प्रकाशमान सिंहको चाक्सीबारीस्थित निवासमा जुटेका हुन् ।

पूर्वपदाधिकारीसहितका यी नेताहरूले आगामी १५ औँ महाधिवेशनको सम्भावित रणनीतिबारे छलफल गरिरहेका छन् ।

उक्त छलफलमा पूर्वउपसभापतिद्वय गोपालमान श्रेष्ठ र विमलेन्द्र निधि पनि सहभागी छन् ।

त्यसैगरी पूर्वमहामन्त्रीहरू सिंह, कृष्णप्रसाद सिटौला र कोइराला परिवारका डा. शशाङ्क कोइराला पनि छलफलमा सहभागी छन् ।

उक्त छलफलमा पूर्व-सहमहामन्त्री एवम् वर्तमान पार्टी प्रवक्ता डा. प्रकाशशरण महत पनि छलफलमा सहभागी छन् । महतले आइतबार मात्रै अस्पतालमा निको भइनसक्दै सभापति शेरबहादुर देउवामाथि आक्रमण गरिएको भन्दै महामन्त्री गगन थापा र विश्वप्रकाश शर्माको आलोचना गरेका थिए ।

सभापति देउवा पक्षीय मानिने यी नेताहरूबीच पार्टीको १५ औँ महाधिवेशनको रणनीति, जेन-जी आन्दोलनपछि कांग्रेसको परिदृश्य र सानेपामा बसेको कार्यसम्पादन समिति बैठकमा महामन्त्रीहरू गगन थापा र विश्वप्रकाश शर्माले नेतृत्व परिवर्तनबारे उठाएको मुद्दा पनि कुरा हुँदैछ ।

महामन्त्रीद्वयले कांग्रेसको विशेष महाधिवेशन र वर्तमान नेतृत्व परिवर्तनलाई लिएर उठाएको विषयमा उनीहरूले साझा मत बनाउने भएका छन् ।