काठमाडौं– पूर्वराष्ट्रपति विद्यादेवी भण्डारीको सम्पर्क कार्यालय काठमाडौंको थापागाउँमा स्थापना हुने भएको छ ।

नयाँ बानेश्वरस्थित थापागाउँमा भण्डारीले ‘मदन भण्डारी ७५औँ जन्मजयन्ती मूल व्यवस्थापन समिति’ को कार्यालयका नामबाट सम्पर्क कार्यालय खोलेकी हुन् ।

कार्यालय उद्घाटनका क्रममा बिहीबार दिउसो पत्रकार सम्मेलन आयोजना गरिएको छ । नेकपा एमालेले सदस्यता नविकण नहुने बताएपनि पूर्वराष्ट्रपति भण्डारीले पार्टीमा समानान्तर गतिविधि अगाडि बढाइरहेकी छिन् । 

भण्डारीलाई साथ दिन एमाले उपाध्यक्ष ईश्वर पोखरेल, युवराज ज्ञवाली र सुरेन्द्र पाण्डेसमेत थापागाउँ पुगेका छन् । त्यसैगरी अर्का नेता कर्ण थापा पनि कार्यालय उद्‌घाटन कार्यक्रममा देखिएका छन् । 

 त्यसैगरी एमाले नेता विनोद ढकाल, अमेरिकाका लागि पूर्वनेपाली राजदूत अर्जुन कार्की र हेटौँडाका पूर्वमेयर डोरमणि पौडेलसमेत भण्डारीको पक्षमा खुलेका छन् ।