काठमाडौं– प्रमुख प्रतिपक्षी नेकपा (माओवादी केन्द्र)ले राष्ट्रिय सार्वभौमिकता र अखण्डताको रक्षाका लागि दह्रोसँग उभिएर चीन र भारतबीच भएको पछिल्लो व्यापार सम्झौतामा आवश्यक प्रभावकारी कूटनीतिक पहल अगाडि बढाउन आग्रह गरेको छ । 

प्रतिनिधिसभाको बिहीबारको बैठकको आकस्मिक समयमा माओवादी केन्द्रका प्रमुख सचेतक हितराज पाण्डेले नेपाली भूमि लिपुलेक भएर व्यापार गर्न भारत र चीनले गरेको पछिल्लो सम्झौतामा आवश्यक प्रभावकारी कूटनीतिक पहल अगाडि बढाउन आग्रह गरेका हुन् । 

‘नेपाललाई जानकारी नदिई गरिएको भनिएको सहमति प्रति आपत्ति प्रकट गर्दछौँ । विरोध गर्दछौँ,’ उनले भने, ‘कुनै पनि सरकारको राष्ट्रिय सावैभौमिकता र अखण्डताको रक्षाको यस प्रकारको काममा दह्रोसँग उभिन, दुवै छिमेकी मित्रराष्ट्रहरूसँग आवश्यक प्रभावकारी कूटनीतिक, राजनीतिक पहल अघि बढाउन यो सदनको प्रमुख विपक्षी दलको तर्फबाट हामी नेपाल सरकारलाई हार्दिक आग्रह गर्दछौँ ।’

माओवादी केन्द्रले भारत र चीनबीच भएको पछिल्लो व्यापार सम्झौताबारे सदनलाई आवश्यक जानकारी गराउन पनि माग गरेको छ ।

 ‘यस विषयमा जनताका प्रतिनिधिहरूको यस सभालाई आवश्यक जानकारी गराउन सरकारलाई हार्दिक अनुरोध गर्दैछौँ,’ प्रमुख सचेतक पाण्डेले भने । 

माओवादी केन्द्रले नेपालको सार्वभौमिकता तथा खण्डताको रक्षा र नेपालको हितको पक्षमा एकजुट हुन आम जनतालाई आह्वान पनि गरेको छ । 

‘यस्तो अवस्थामा राष्ट्रिय एकतालाई सबल पार्दै नेपालको सार्वभौमिकता तथा खण्डताको रक्षा र नेपालको हितको पक्षमा एकजुट हुन आम जनतालाई पनि सम्माननीय सभामुखजयूमार्फत् हामी हाम्रो दलको तर्फबाट अनुरोध गर्दछौँ ।’