काठमाडौं– शहरी विकास मन्त्रालयअन्तर्गतका प्राथमिकता प्राप्त आयोजनाहरूको मन्त्रालयबाटै अनुगमन गर्न अनलाइन अनुगमन कक्षको शुभारम्भ गरिएको छ ।

बिहीबार मन्त्रालयमा उपप्रधान एवं शहरी विकास मन्त्री प्रकाशमान सिंहले अनलाइन अनुगमन कक्षको शुभारम्भ गरेका हुन् ।

अनुगमन कक्षबाट प्राथमिकतामा रहेका आयोजनामा भइरहेको गतिविधि प्रत्यक्ष रूपमा हेर्न सक्ने व्यवस्था गरिएको छ । अनुगमन कक्षको शुभारम्भ गर्दै सिंहले प्रविधिको सदुपयोग गरेर आयोजनाको कार्यलाई तीव्रता दिनका लागि अनलाइन अनुगमन गर्न खोजिएको बताए । यसका साथै फिल्डमा नै गएर समेत अनुगमन गरिने उनको भनाइ छ ।

सिंहले आयोजना निर्माणका क्रममा देखिन सक्ने समस्यालाई समेत समाधान गर्न सहज हुने बताए  ।  

निरन्तरको अनुगमनपछि आयोजनाहरू समयमा नै सम्पन्न हुन मद्दत पुग्ने उनको विश्वास छ । उनले अनुगमन कक्षको अधिकतम सदुपयोग गर्न निर्देशन समेत दिए  ।