काठमाडौं – नेपाली कांग्रेसका केन्द्रीय सदस्य कल्याणकुमार गुरूङले तीनवटै तहमा जनप्रतिनिधि छनौटका हुने निर्वाचनको अन्तिम समयमा उम्मेदवार छनौट गर्ने परम्पराको अन्त्य गर्नुपर्ने बताएका छन्।

सामाजिक सञ्जाल फेसबुकमार्फत् उनले बिहीबार निर्वाचनमा अन्तिम समयमा उम्मेदवार छनौट गर्ने परम्परा गलत भएको भन्दै परिवर्तन गर्नुपर्ने बताएका हुन्।

नेता गुरूङले तीनवटै तहको निर्वाचन हुनुभन्दा दुई वर्ष अगाडि नै पार्टीले उम्मेदवार घोषणा गर्नुपर्ने सुझाव पनि दिएका छन्। दुई वर्ष अगावै उम्मेदवार छनौट गर्दा पार्टीलाई अधिकतम सिटमा विजय हासिल गर्न मद्दत पुग्ने उनको भनाइ छ।

‘नेपाली कांग्रेसले सबै तह (प्रतिनिधि सभा, प्रदेश सभा र स्थानीय तह) को उम्मेदवारको छनौट र घोषणा दुई वर्ष अगाडि नै गर्नुपर्छ,’ गुरूङले लेखेका छन्, ‘यसले पार्टीलाई अधिकतम सिटमा विजय हासिल गर्न मद्दत पुग्छ।’

दुई वर्ष अगाडि नै उम्मेदवार छनौट गर्दा पार्टीका रिसाएका नेता–कार्यकर्तालाई फकाउनेदेखि जनताको घर दैलोमा पुग्ने र मत माग्ने प्रशस्त समय हुने उनको भनाइ छ।

‘दुई वर्ष अगाडि नै उम्मेदवार छनौट गर्दा पार्टीका रिसाएका साथीलाई फकाउने प्रशस्त समय हुन्छ,’ गुरूङले लेखेका छन्, ‘जनताको घर दैलोमा पुग्ने र मत माग्ने प्रशस्त समय हुन्छ। चुनावको लागि तयारी गर्ने पनि प्रशस्त समय हुन्छ।’